Unha cociña sinxela e de sabores auténticos, de profundo respecto ao produto é o que atopamos detrás da Horta d’Obradoiro, un soño feito realidade no que está o traballo de tres cociñeiros: Francisco Piñeiro, Eloy Cancela e Vanesa Vera que construíron esta “pequena aldea” na que podemos atopar diferentes ambientes.

Así podemos atopar unha pequena barra inicial que a través dun corredor permitiranos ver o corazón da Horta, unha cociña vista que nos permite asomarnos ás creacións que poderemos gozar no bonito comedor dividido por unha rampla que nos conduce de forma natural até o invernadoiro exterior, ideado dunha forma funcional para permitir comidas de grupo ou íntimas ceas de parella.